મારા દિવસો થાય પસાર.
ગંગાતીરે ‘મા મા’ કરતાં દિવસો થાય પસાર.
હિમગિરિમાળા, વૃક્ષો ન્યારાં, ધરતી રસની ધાર,
એ સૌ સાથે એકલ બેઠો લઈ આંસુની માળ ... મારા.
ભાવવિભોર બન્યા અંતરની વીણાના સૌ તાર;
એક જ ગાયે ગીત નિરંતર, સ્નેહ જ એનો સાર ... મારા.
ભરીભરી મધુરસની પ્યાલી પીઊં વારંવાર;
ખૂટે ના કદિ, તૃપ્ત કરે ના, મોહનદીની પાર ... મારા.
ફૂલથકી કોમળ અંતરમાં ભરિયા ભાવ હજાર;
અનુરાગથકી અંજલિ આપું, અર્પું પ્રાણ રસાળ ... મારા.
ધ્યાન તમારું, સ્વપ્ન તમારાં, તમારો જ સંસાર;
તમારી જ મસ્તી ને સેવા, જીત તમારી હાર ... મારા.
કુબેરથીયે વધુ વૈભવ છે, લક્ષ્મીનો ના કાળ;
દેવોને પણ દુર્લભ રસ છે મળ્યો હજી તલભાર ... મારા.
બાકીના દિન જીવનના હો મિલન મહીં જ પસાર,
‘પાગલ’ની છે એ જ પ્રાર્થના, કરો વિરહથી પાર ... મારા.
- © શ્રી યોગેશ્વરજી