હવે નથી રહેવાતું વિરહે, હવે નથી રહેવાતું.
લેશ નથી જ સહાતું સંકટ, લેશ નથી જ સહાતું ... હવે.
આજકાલ કરતામાં મારું વધી ગયું છે ખાતું;
અંતરનું આ આશાભીનું કુસુમ રખે કરમાતું ... હવે.
દિલનું દર્દ રહસ્ય નથી કોઈને પણ કહેવાતું;
મૂંગે મોંઢે ખૂબ સહ્યું મેં; કોને ના દેવાતું ... હવે.
ગીતમહીં આ અગન ઠાલવું, રાખી મન મદમાતું;
પરંતુ ગુપ્ત રહસ્ય કહું કે હૈયું નથી હરખાતું ... હવે.
તમારા વિના જગત બધું યે શૂન્ય મને દેખાતું;
તમારા વિના મુક્તિનું પણ સુખ નીરસ લેખાતું ... હવે.
મિલનતણું મંગલ સુખ મુજને કેમ નથી દેવાતું?
‘પાગલ’ કેમ સ્વજનનું સંકટ હરી નથી લેવાતું? ... હવે.
- © શ્રી યોગેશ્વરજી