ક્યારે દર્શન થાય તમારું !
એ જ લગન છે લાગી દિલને દર્શન થાય તમારું,
ક્યારે દર્શન થાય તમારું !
તરસ તપાવે અંતરને એ, જીવન કરતી ખારું;
લોચનિયાં આ અખંડ ઝંખે, ક્યારે તમને ભાળું !
ક્યારે દર્શન થાય તમારું !
ક્યારે પ્રકટો રૂપ લઈને રસમય ને રઢિયાળુ;
સંગમ થતાં ઉભયનો બનશે તીર્થ ખરેખર ન્યારું.
ક્યારે દર્શન થાય તમારું !
દિલ તલપે છે દિલને મળવા, પરંતુ બહુબહુ વારું;
ઉપાય એકે હાથ ન આવે, ધીરજ તોયે ધારું.
ક્યારે દર્શન થાય તમારું !
કુસુમથકી પણ કૈંયે કોમળ, ચંદ્રથકી પણ ચારુ,
અંગ અનંગનિકેતન ક્યારે નેનન ભરી નિહાળું !
ક્યારે દર્શન થાય તમારું !
‘પાગલ’ કર્યો મને તે માનું નસીબ મોટું મારું;
રહો અધિક પણ દૂર હવે તે સમજો તો નહિ સારું.
ક્યારે દર્શન થાય તમારું !
- © શ્રી યોગેશ્વરજી