આજે આંખ ફરકતી મારી.
મંગલકારક લેખાયે એ, લાભ થવાનો ભારી ... આજે.
પવન પ્રસન્નપણે પ્રસરે આ, સુવાસ કેવી ધારી;
ફોરમ ઉપવનમાં ફેલાઈ, કુસુમોની શી ન્યારી ! ... આજે.
આહલાદક છે ચંદ્ર ખરેખર આજ અનેરો કાંઈ;
ખુલ્લા ગગને ચમકે છે એ, અખંડ અમૃતમાંહી ... આજે.
મંદિર મારું ખૂબ મહેંકે, ઉત્સવ જાણે ભારી;
અંતરમાં આનંદ ન માયે, વાગે વીણા સારી ... આજે.
કોનો મધુરો ઉત્સવ આજે, કોની આ તૈયારી ?
કોના સ્વાગતની આ લીલા સઘળી મંગલકારી ? ... આજે.
ખબર તમારા શુભાગમનની આ તો સઘળી સારી;
તમારાવિના લાભ ન બીજો મંગલ મારે કાંઈ ... આજે.
ભલે પધારો, પાવન થાયે આજ મઢૂલી મારી;
અવશ્ય આવો, જીવનમંગલ, લેવા મને ઉગારી ... આજે.
માળા છે તૈયાર કરી આ સ્વાગતકાજ રૂપાળી;
‘પાગલ’ કહે ચરણમાં અર્પું જઈ રૂપ પર વારી ... આજે.
- © શ્રી યોગેશ્વરજી