હૃદય છે રાગથકી ભરપૂર.
તમારા અનુરાગે ભરપૂર.
ભાવ ભર્યા છે એમાં તેમજ
આવ્યું રસનું પૂર;
ઊર્મિતરંગ ઉછળતાં કેવાં,
સંવાદી છે સૂર ... હૃદય છે.
તમારામહીં રત છે, કેવલ
ભર્યું તમારે નૂર;
તમારી જ પૂજામાં ડૂબ્યું,
બીજું ગણતાં ધૂળ ... હૃદય છે.
તમને મળવા માટે ઝંખે,
છેક બન્યું આતુર;
તમારા જ રસમાં સ્નાન કરે,
યાદમહીં ચકચૂર ... હૃદય છે.
સોડમહીં એ ચહે સમાવા,
બન્યું ભાવભરપૂર;
‘પાગલ’ કહે સવેળા આવો
બજવી મંજુ નુપૂર ... હૃદય છે.
- © શ્રી યોગેશ્વરજી