નયનમાં નેહલ નેન મળે.
હૃદય આ ભાવસમાધિ કરે.
પરમશાંતિમાં સ્નાન કરે ને
પ્રાણ સુવાસ ધરે;
વિસરી જાયે સુધબુધ સઘળી,
પીડા પૂર્ણ ટળે ... નયનમાં.
અમૃતસ્વાદે ધન્ય બને ને
ભેદ બધા વિસરે;
અગણિત વરસોની સાધ શમે,
કાલ કરાળ મરે ... નયનમાં.
તપવ્રત તીરથ યોગયજ્ઞનું
અંતિમ લક્ષ મળે;
સફળ સાધના થાયે સારી.
ઉત્સવ પ્રાણ કરે ... નયનમાં.
નયન મધુર એ મળે જેહને
તેનું ભાગ્ય ફરે;
‘પાગલ’ કહે ઉભય ઉરનો
એ સંગમ ભલે કરે ! ... નયનમાં.
- © શ્રી યોગેશ્વરજી