એક ફૂલ ઉપવનમાં ઊગે. બીજા ચેતન ફૂલ;
બાળક નામ ફૂલડાંનુ એ, સાચેસાચ અમૂલ.
બાળ આ ધરતી કેરાં ફૂલ, એમાં ખરે નથી કૈં ભૂલ.
એક ઝરણ જંગલમાં દોડે. બીજાં ઝરણ સજીવ;
બાળક નામ ઝરણકેરું એ, કેવાં સુંદર શિવ ?
બાળ આ ધરતી કેરાં ફૂલ, એમાં ખરે નથી કૈં ભૂલ.
એક તારલા છે આકાશે, બીજા તારક બાળ;
ટમટમી રહ્યા દિવ્ય તેજથી, પેદા કરી વહાલ.
બાળ આ ધરતી કેરાં ફૂલ, એમાં ખરે નથી કૈં ભૂલ.
એક જ્યોત મંદિરમાં જાગી, બીજી બાળક જ્યોત;
પ્રકાશ ભરતી ઘરમાં કેવો, કરે શોકનું મોત.
બાળ આ ધરતી કેરાં ફૂલ, એમાં ખરે નથી કૈં ભૂલ.
- શ્રી યોગેશ્વરજી