વહેલી સવાર, મીઠી મજાની વહેલી સવાર !
મંદમંદ વાયુ વાય, તારલિયા ગીત ગાય;
ફરવા જવાથી કેવો આનંદ થાય ?
વસતી બહાર, નદીસાગરની પાર,
વહેલી સવાર, મીઠી મજાની વહેલી સવાર !
ઉઠે સૂરજ એની પહેલાં જ ઉઠીએ,
પ્રાર્થના કરીને જરા આનંદ લુંટીએ;
કરિયે વ્યાયામ પછી બનિયે તૈયાર,
વહેલી સવાર, મીઠી મજાની વહેલી સવાર !
ઉડે વિહંગ વળી, તે વખતે પાઠ કરી,
લેવાથી યાદ રહે કેવો સૌ સાર ?
વહેલી સવાર, મીઠી મજાની વહેલી સવાર !
તાજગીને આપતી, દળદરને કાપતી,
કેવી રસીલી વહેલી સવાર !
વહેલી સવાર, મીઠી મજાની વહેલી સવાર !
- શ્રી યોગેશ્વરજી