સૂર્યચંદ્ર તપે હાસે પૃથ્વી ને વ્યોમ જ્યાં લગી
સ્વતંત્રતા મળેલી આ રહો અમર ત્યાં લગી.
નદીનિર્ઝર આલાપે ગાય અર્ણવ જ્યાં લગી
સ્વતંત્રતા મળેલી આ રહો અમર ત્યાં લગી.
પુષ્પ ખીલે પડે વર્ષા, વાયુની લહરી વહે,
સ્વાતંત્ર્ય સાંપડેલું આ ત્યાં લગી કાયમી રહે.
રહે પર્વતશૃંગો સૌ વૃક્ષઔષધિ જ્યાં લગી
સ્વાતંત્ર્ય સાંપડેલું આ રહો અક્ષય ત્યાં લગી.
ચક્ર સંસૃતિનું ચાલે જીવે માનવ જ્યાં લગી
સ્વતંત્રતા મળેલી આ રહો અમર ત્યાં લગી.
તૂટો બંધ ગુલામીના શેષ સૌ વસુધા મહીં;
પ્રયાસો શાંતિસિદ્ધિના થાઓ નિષ્ફળ ના કહીં.
વિજ્ઞાનબળ ને બુદ્ધિ સંપત્તિ સૃષ્ટિની સદા
શ્રેયસ્કર બનો સૌને કરો ઘર્ષણ ના કદા.
કુટુંબ શી બનો પૃથ્વી સંપસ્નેહ થકી ભરી
પૂર્ણાહુતિ કરું એવી ભાવના પ્રાર્થના કરી.