શિકારી, તારી જાતનો કરને શિકાર
તારો પોતાનો કરને વિચાર ... શિકારી
બંદૂક ધારી શાને વનમાં ભમી રહ્યો છે,
નિર્દોષ જીવોને કાં માર ?
કુદરતને ખોળે ખેલે કિલ્લોલ કરતાં પંખી,
હત્યા શાને કરે ગમાર ? ... શિકારી
જીવન છે સૌને પ્યારું, સમજી લે તો તો સારું,
છાંટો દયા તો દિલે ધાર;
નિર્દય થા ક્રૂર નહીં જોજે જગતમાં કહીં,
જીવનને કાજે જીવન હાર ... શિકારી
મદ ને મમતાને મારી કામક્રોધ દે તું બાળી,
આસક્તિ છોડી દે અસાર;
જ્ઞાનની ગોળી મારી અહંકાર દે સંહારી,
બેડો તો થાયે તારો પાર ... શિકારી
દુઃખી કરે ભમાવે મનની વૃતિઓ તારી,
વૃતિઓ તારી તે ઉજાળ;
પ્રભુના જ પ્રેમમાં 'પાગલ' બની જા ભાઇ,
બગડેલી બાજીને સુધાર ... શિકારી
- શ્રી યોગેશ્વરજી